നിമിത്തം

അഞ്ചു വര്‍ഷങ്ങള്‍ക്കു മുമ്പ് ഇതേ ദിവസം. ഓഗസ്റ്റ്‌ 4TH. 

അന്ന് ഓടി കിതച്ചു പപ്പന്‍ വന്നു പറഞ്ഞു  " അളിയാ അപ്പറത്തെ ക്ലാസ്സില്‍ ഒരു ന്യൂ അഡ്മിഷന്‍ ".
ചെന്ന് നോക്കിയപ്പോള്‍ പണ്ട് സ്കൂളില്‍ ജൂനിയര്‍ ആയി പഠിച്ച പെണ്‍കുട്ടി.
"നിഷ", അതായിരുന്നു അവളുടെ പേര്. പെട്ടെന്ന് ഓര്‍മ്മ കിട്ടി.
ഇവള് അങ്ങ് വലിയ പെണ്ണ് ആയല്ലോ.
അന്ന് തന്നെ ഒരു പൂ കൊടുത്തിട്ട് അവളോട്‌ ഇഷ്ടം അറിയിച്ചു.
ആദ്യം ഒക്കെ ജാഡ ഇട്ടു നിന്നെങ്കിലും ഒരു രണ്ടു ആഴ്ച കൊണ്ട് ഞങ്ങള്‍ കമിതാക്കള്‍ ആയി.
ഒരിക്കലും ഇവള് എന്റെ പ്രണയിനി ആകുമെന്ന് ഞാന്‍ പ്രതീക്ഷിച്ചതെ അല്ല.

നിമിത്തം എന്ന് ഒന്ന് ഉണ്ടാവാം. പ്രണയിച്ചു തുടങ്ങിയപ്പോള്‍ ആണ് പണ്ട് സ്കൂളില്‍ വെച്ച് ഉള്ള പല സന്ദര്‍ഭങ്ങളെയും കുറിച്ച് അവള് എന്നോട് പറഞ്ഞത്. അവള് എന്നെ നോട്ടമിട്ടിരുന്നു അന്ന് എന്ന് അറിഞ്ഞപ്പോള്‍
ഒരു ചെറിയ സുഖം തോന്നി. ജീവിതത്തിനു ഒരു അര്‍ത്ഥം തോന്നിയതും എന്റേത് മാത്രമായി എനിക്ക് സ്നേഹിക്കാന്‍ ഒരാളെ
കിട്ടിയതും ആ ദിവസങ്ങളില്‍ ആയിരുന്നു..

നാളെ ആണ് ആ ദിവസം. എന്റെ വിവാഹ ദിവസം. ഇതെല്ലാം ഒന്ന് ഓര്‍ത്തു എടുക്കാന്‍ പറ്റിയ സമയം തന്നെ എന്ന് തോന്നി.
അവളും വരും. "നിഷ". ഒരുപാട് നാളുകള്‍ക്കു ശേഷം എന്റെ വിവാഹം ആണെന്ന് അറിയിക്കാനായി ഞാന്‍ വിളിച്ചു കഴിഞ്ഞ ദിവസം.
ഒരു രണ്ടു മിനിറ്റ് സംസാരിച്ച ശേഷം അവള് അന്ന് പറഞ്ഞു  " ഇപ്പം പിടി കിട്ടി. ആദ്യം എനിക്ക് ശബ്ദം മനസിലായില്ല. ലോങ്ങ്‌ ടൈം എഹ്,

ഇച്ചായന് എന്നെ ഒരുപാട് ഇഷ്ടമാ. ലൈഫ് ഈസ്‌ ടൂ ഗുഡ്. നോക്കട്ടെ വരാന്‍ പറ്റുമോ എന്ന്. ഹി ഈസ്‌ ടൂ ബിസി, യു നോ  "

നന്നായി സംസാരിക്കും ഈ പെണ്‍കുട്ടികള്‍..
നല്ല ഉച്ചാരണം, നല്ല ശൈലി.
മനസ്സില്‍ എല്ലാം ഇങ്ങനെ ഓര്‍ത്തു അയവിറക്കിയപ്പോള്‍ പുറത്തൊരു അടി.
തിരിഞ്ഞു നോക്കിയപ്പോള്‍  ഞെട്ടാനൊന്നുമില്ല.
പപ്പനാണ്.

അവന്‍  കിതച്ചുകൊണ്ട് പറഞ്ഞു : " അളിയാ അപ്പറത്തെ വീട്ടില്‍ ഒരു കിളുന്തു പെണ്‍കുട്ടി "